АМКА НА ПРОСЛАВАТА НА ЈУБИЛЕЈОТ НА ВАРДАР
Тепачка на „комитите“ со бугарските навивачи


Војна на трибините меѓу гостинските навивачи „чорбари“ и скопските „комити“ на пријателскиот фудбалски натпревар меѓу Вардар и ЦСКА (1-2) проследија околу 300 гледачи вчера на Градскиот стадион во Скопје. Настанот требаше да биде свечен по повод 60-годишниот јубилеј на домаќините, а се претвори во битка со метални прачки, откорнати столчиња и останати тврди предмети на дел од Јужната трибина. Еден симпатизер на ЦСКА, според бугарските медиуми, минал со скршена глава, а неколкумина се повредени во 20-минутниот „хорор“. МВР инцидентот го окарактеризира како нарушување на јавниот ред и мир, а немаше податоци за повредени, ниту пак некого приведе.

Се' почна во 20. минута од мечот, со провокација на 50-на гостински фанови кои со столчиња јуришаа кон дел од публиката на Јужната трибина. Возвратија „комити“, па битката гради в гради се пресели пред влезната порта на просторот, предвиден за гостинските навивачи на главната трибина. Ситуацијата се смири по интервенција на првично малубројните полицајци, која доби засилување дури пред истекот на првото полувреме.

Почетокот не навестуваше инциденти на натпреварот што требаше да биде празник за Вардар. Во 15. минута, судијата Делчо Јакимовски и бранителот на „црвено-црните“, Владимир Секуловски, вешто одглумија инцидент, што ја збуни, а потоа и ја орасположи публиката. Левиот бек протестираше кај судијата, одземајќи му го жолтиот картон, овој го исклучи, а потоа двајцата се прегрнаа, означувајќи го и официјално простувањето на Јакимовски од судиската сцена по 20 години. Следеа вистинските инциденти и општата тепачка, во која гостинските навивачи го извлекоа подебелиот крај. Во сенка на бркотницата на трибината, остана експресната предност на ЦСКА од два гола. Романскиот репрезентативец Флорентин Петре и напаѓачот Георги Илиев во период од 3 минути во финишот на првото полувреме (40 и 43 минута) по еднаш го погодија голот на нашиот репрезентативец Јорде Георгиевски за комотна предност на повеќекратниот бугарски шампион. При вториот погодок, Илчо Поцев беше исклучен, но раководствата на двата клуба се договорија силите и во вториот дел да бидат израмнети. Наместо исклучениот Поцев настапи Драган Трајковиќ, а во игра влегоа сите 10 резервни играчи кај Вардар. Почесниот погодок за домаќините беше дело на Бурхан Емурлаи од пенал во 60. минута.

„Црвено-црните“ најавија возвратна средба со ЦСКА во Софија напролет, но сега гостувањето на Вардар е неизвесно.